راولپنڈی: وزیر اعظم شہباز شریف کی اپیل پر متحدہ عرب امارات (یو اے ای) کا طیارہ پاکستان کے سیلاب سے متاثرہ افراد کے لیے امدادی سامان لے کر اتوار کو راولپنڈی کے نور خان ایئربیس پر پہنچ گیا۔
امدادی سامان میں خیمے، کھانے پینے کی اشیاء، ادویات اور دیگر ضروری سامان شامل ہے۔ پاکستان میں متحدہ عرب امارات کے سفیر اور وزیر منصوبہ بندی احسن اقبال نے ایئرپورٹ پر امدادی سامان کا استقبال کیا۔
واضح رہے کہ متحدہ عرب امارات کے صدر شیخ محمد بن زید النہیان کی ہدایت پر آئندہ دنوں میں مزید 15 طیارے امدادی سامان لے کر پاکستان پہنچیں گے۔
متحدہ عرب امارات کے صدر شیخ محمد بن زاید نے ہفتہ کے روز وزیراعظم محمد شہباز شریف کو ٹیلی فون کیا اور پاکستان کے مختلف حصوں میں طوفانی بارشوں اور اچانک سیلاب سے قیمتی جانوں کے ضیاع پر دلی تعزیت کا اظہار کیا۔
متحدہ عرب امارات کے صدر نے مشکل کی اس گھڑی میں پاکستانی عوام کے ساتھ مکمل یکجہتی کا اظہار کیا اور تمام زخمیوں کی جلد صحت یابی کی خواہش کی۔
انہوں نے اس قدرتی آفت سے نمٹنے کے لیے پاکستان کو ہر ممکن مدد کی پیشکش کی۔ اس تناظر میں، انہوں نے وزیراعظم کو آگاہ کیا کہ متحدہ عرب امارات فوری طور پر خیموں اور پناہ گاہوں کے سامان کے علاوہ کھانے پینے کی اشیاء کے ساتھ ساتھ طبی اور دواسازی کا سامان بھی بھیجے گا۔
مرنے والوں کی تعداد 1000 تک پہنچ گئی۔
ملک کی نیشنل ڈیزاسٹر مینجمنٹ اتھارٹی (این ڈی ایم اے) کے اتوار کو جاری کردہ اعدادوشمار کے مطابق، جون سے اب تک پاکستان میں مون سون کے سیلاب سے مرنے والوں کی تعداد 1,033 تک پہنچ گئی ہے۔
اس میں کہا گیا ہے کہ گزشتہ 24 گھنٹوں میں 119 لوگوں کی موت ہوئی ہے کیونکہ ملک کے مختلف حصوں میں شدید بارشیں جاری ہیں۔
سالانہ مون سون فصلوں کو سیراب کرنے اور پورے برصغیر میں جھیلوں اور ڈیموں کو بھرنے کے لیے ضروری ہے، لیکن ہر سال یہ تباہی کی لہر بھی لاتا ہے۔