راولپنڈی: پاک فوج کے شعبہ تعلقات عامہ (آئی ایس پی آر) کے ایک بیان میں کہا گیا ہے کہ کمانڈر یو ایس سینٹ کام جنرل مائیکل ایرک کوریلا نے جمعرات کو آرمی چیف جنرل قمر جاوید باجوہ سے جی ایچ کیو میں ملاقات کی۔
فوج کے میڈیا ونگ کے مطابق جنرل مائیکل ایرک کوریلا نے آرمی چیف سے ون آن ون ملاقات کی اور ملاقات میں باہمی دلچسپی کے امور، علاقائی سلامتی کی صورتحال، دفاع اور سیکیورٹی تعاون بالخصوص ملٹری ٹو ملٹری تعلقات پر تبادلہ خیال کیا۔
ون آن ون ملاقات کے بعد وفود کی سطح پر ملاقات ہوئی جس میں پاک فوج کی انسداد دہشت گردی کی کوششوں اور علاقائی امن و استحکام کے لیے اہم کردار پر تبادلہ خیال کیا گیا۔ آئی ایس پی آر نے کہا کہ پاکستان امریکہ فوجی تربیتی تبادلہ پروگرام بھی زیر بحث آیا۔
معزز مہمان نے دہشت گردی کے خلاف جنگ میں پاک فوج کی قابل ستائش کوششوں، انسداد دہشت گردی کے تجربات اور علاقائی امن و استحکام کے لیے کوششوں کا اعتراف کیا۔
بعد ازاں معزز مہمان نے آرمی میوزیم کا بھی دورہ کیا اور مختلف تاریخی دیواروں میں گہری دلچسپی لی۔